Norðurfjörður er vík norðan Trékyllisvíkur með samnefndu þorpi, þar sem standa mörg hús auð og 
yfirgefin. Þarna er rekin lítil verzlun fyrir hina fáu, sem eru eftir í byggðarlaginu. Akfær vegur liggur að Munaðarnesi, yzt við Ingólfsfjörð. Annar vegur liggur um Meladal niður í fjarðarbotninn að Eyri, þar sem síldarvinnslan var, og áfram fyrir fjórhjóladrifna bíla í Ófeigsfjörð. Þá liggur vegur að Felli á Veturmýrarnesi. Margir aka þann veg áleiðis til að njóta sundlaugarinnar að Krossnesi.
Kálfshamarstindur (646m) rís yfir botn Norðurfjarðar. Þaðan er góður útsýnisstaður yfir hluta Stranda og Húnaflóa.
Við endann á veginum inn með Norðurfirði, sem er í bröttum skriðum, er Stórakleif. Þar stendur drangur í stórgrýttri fjörunni. Sagt er, að Guðmundur biskup góði hafi setið í holu í þessum drangi, þegar hann vígði skriðurnar, sem eru oftast nefndar Urðir. Áður en hann vígði skriðurnar voru slys tíð þar.
