Hofsós er lítið og vinalegt þorp við austanverðan Skagafjörð, tiltölulega stutt frá Sauðárkróki. Hofsós á 
að baki 400 ára sögu verslunar og viðskipta og sjást leifar þessarar löngu verslunarsögu í Pakkhúsinu. Pakkhúsið var byggt 1772 úr innfluttum viði frá Danmörku á tímum dönsku einokunarverslunarinnar.
Þar er Vesturfarasetrið margrómaða, sem svo sannarlega er vert að skoða. Góðir, snyrtilegir veitingastaðir í gömlum stíl eru á Hofsósi og hafa allar byggingar þar verið gerðar upp, flestar í upprunalegri mynd, og minnir staðurinn á skemmtilegt byggðasafn og er vel þess virði að eyða hálfum, eða heilum, degi þar í rólegheitum.
Grafarós við ósa Grafarár, skammt sunnan Hofsóss, var verzlunarstaður frá 1835 til 1915, hinn mesti við Skagafjörð. Þarna eru friðlýst tóttarbrot uppi á hæð. Staðarbjörg utan Grafaróss eru stuðlabergssyrpa niðri við sjó.
Kolkuós (Kolbeinsárós), alllangt sunnan Hofsóss utan mynnis Hjaltadals, var meðal helztu hafna landsins á miðöldum og jafnframt höfn Hólastóls. Samkvæmt Landnámu komu hross fyrst á land á Íslandi í Kolkuósi.
Vegalengdin frá Reykjavík er um 340 km .
