Við Stöðvarfjörð norðanverðan er samnefnt kauptún. Þar hófst verzlun árið 1896 og byggðarkjarni 
myndaðist út frá henni. Aðalatvinnuvegur Stöðfirðinga er fiskvinnsla og útgerð en sjósókn hefur verið stunduð þar lengur en víðast annars staðar á Austfjörðum. Þorskeldi var stundað á Stöðvarfirði, en það þykir sérstakt hérlendis.
Ljósbjörg Petra María Sveinsdóttir (24.12.1922-10.01.2012) og fjölskylda hennar á Stöðvarfirði safnaði stærsta einkasteinasafni í heimi.
Víða um Austfirði má finna sjaldgæfa og sérkennilega steina. Petra fann upphaflega flesta steina sína í fjöllunum við Stöðvarfjörð. Nafn fjarðarins og kaupstúnsins er dregið af verstöðvum, sem voru þar fyrrum.
Margir áhugaverðir staðir og skemmtilegar gönguleiðir eru við Stöðvarfjörð, s.s. brimhverinn Saxi niðri við sjó í landi Bæjarstaða, merkilegt náttúrufyrirbrigði, sem best er að skoða þegar hreyfir vind. Steðjinn er um klst. göngu frá kauptúninu. Þar er stórt kerald, sem sagt er að íbúar hafi flúið í, þegar Tyrkir fóru ránshendi um Austurland 1627.
Vegalengdin frá Reykjavík er um 650 km um suðurströndina.
