Haganesvík er fyrrum kauptún í Fljótum við samnefnda vík inn úr Fljótavík. Alfaraleiðin var þarna með 
ströndinni og þá var eðlilegt að verzlunarstaður myndaðist. Hann fékk löggildingu árið 1897. Áður voru tvær sveitaverzlanir í Fljótum, s.s. á Hraunum frá 1879 og Yzta-mói frá 1890. Engu að síður sóttu Fljótamenn aðallega verzlanir á Siglufirði og Hofsósi. Um aldamótin 1900 var verzlun Einars B. Guðmundssonar flutt frá Hraunum til Haganesvíkur og skömmu síðar tók Gránufélagið við rekstrinum. Þá var stofnað Kaupfélag Fljótamanna, sem hætti fljótlega vegna erfiðleika í rekstri. Samvinnufélag Fljótamanna var stofnað 1919. Það byggði verzlunarhús, sláturhús og frystihús. Höfnin er fyrir opnu hafi og ótrygg, þannig að öruggast er að setja báta upp. Þarna var mikil verstöð, einkum tengd hákarlaveiðum. Þarna er ekki lengur um útgerða að ræða nema til sjálfsafla.
Bréfhirðing hófst í Haganesvík árið 1896 og póstafgreiðsla frá 1929. Landsímastöð hóf starfsemi árið 1910. Þingstaður Fljótamanna var þar og félagsheimili. Gistihús var byggt og starfrækt um tíma. Skákfélagið, sem var stofnað um 1930 varð að málfundafélagi og síðan að ungmennafélagi. Vegna mikilla snjóþyngsla niðri við sjóinn var farið að huga að snjóléttari leið í gegnum Fljótin, þegar landflutingar færðust í vöxt. Núverandi vegastæði er mun snjóléttara og lagning þessa nýja vegar olli landauðn í Haganesvík. Nú er aðalþjónustumiðstöð sveitarinnar að Ketilási við vegnamót Siglufjarðarvegar og vegarins yfir Lágheiði. Eina starfsemin, sem varð eftir niðiri í Haganesvík var rekstur frystihússins vegna geymslu á kjöti.
