Dómadalsleið er vestasti hluti hinnar gömlu Landmannaleiðar, sem er tíðast kölluð Fjallabaksleið nyrðri. Hún liggur austur úr Sölvahrauni, austan norðanverðs Búrfells og Þjórsár, austur að Frostastaðavatni. Vestast, í Sölvahrauni, liggur hún milli Sauðafells og Valafells um Klofninga (Hekluhraun frá 1878). Þaðan liggur slóð til suðurs að norðuröxl Heklu og Skjólkvíahrauni (1970). Þegar Klofingum sleppir liggur gamall slóði norðaustur að Valagjá og um svæði, þar sem Helliskvísl hverfur í sandinn. Lítið eitt austar liggur leiðin yfir suðurtungu Lambafitjahrauns (1913) og meðfram Krókagiljabrúnum og Sauðleysum inn í Kringlu. Við Rauðufossakvísl liggur leið inn að Landmannahelli og aftur inn á Dómadalsleið, en aðalleiðin liggur norðan Sátubarns og sunnan Langsátu. Austan Sátubarns liggur slóð til suðurs og upp brattar hlíðar Mógishöfða norðvestanverðra inn í Hrafntinnusker og alla leið suður á Miðveg (Fjallabaksveg syðri) við Laufafell. Norðan Mógilshöfða liggur Dómadalsleiðin upp úr Kringlu um Dómadal yfir Dómadalshraun að Frostastaðavatni.
Þessi leið er stundum vandekin vegna vatnsfalla á leiðinni, þannig að bezt er að vera á fjórhjóladrifnum farartækjum.
Dómadalur er dalverpi austan Kringlu (Landmannahellis) á Dómadalsleið (Landmannaleið). Þar er lítið og grunnt, samnefnt og afrennslislaust stöðuvatn (Dómadalsvatn), sem minnkar talsvert á sumrin. Dalurinn er að hluta grasi vaxinn og á vorin og snemmsumars er hann að mestu undir vatni. Nafn dalsins er talið dregið af dómþingi, sem var háð þar vegna deilna milli Landmanna og Skaftfellinga. Austan dalsins er sandorpið hrafntinnuhraun, Dómadalshraun, er á leiðinni að Frostastaðavatni og til Landmannalauga.
Ferðaþjónustan Landmannahellir ehf. er í alfaraleið þeirra sem fara ríðandi um hálendið, enda góð aðstaða þar fyrir hestaog ferðafólk. Fyrir hrossin eru þrjú stór gerði, 40 hesta hús og hey. Svefnpokagisting er í fjórum húsum fyrir samtals 74 gesti í einbreiðum og tvíbreiðum kojum. Húsin eru með upphitun, rennandi vatni, eldunaraðstöðu og vatnssalerni. Einnig er við Landmannahelli svæði fyrir tjöld, fellihýsi og húsbíla, smáhýsi með hreinlætisaðstöðu, útigrill og veiðileyfasala. Ferðaþjónustan er opin frá miðjum júní fram í september. Utan þess tíma er hægt að fá gistingu í einu húsanna eftir því sem færð og veður leyfir.
