Möðrudalur stendur bæja hæst (469m) og lengst inni í óbyggðum. Jörðin er meðal hinna landmestu og 
getur fé gengið þar sjálfala. Þjóðvegurinn var fluttur norðar á svokallaða Háreksstaðaleið árið 2000, þannig að staðurinn er ekki í þjóðleið lengur.
Kirkjuna í Möðrudal byggði Jón A. Stefánsson (1880-1971) árið 1949 til minningar um konu sína. Jón smíðaði og prýddi kirkjuna sjálfur. Altaristaflan sýnir Fjallræðuna. Austan Möðrudals liggja vegir inn á Brúaröræfi og til Kverkfjalla.
Ferjufjall (547m) er vestan Jökulsár á Fjöllum, nokkru sunnar en Möðrudalur. Þar var fyrrum ferjustaður fyrir þá, sem fóru um Ódáðahraunsveg. Þaðan eru 55-60 km að Suðurárbotnum og 70 km að Skjálfandafljóti. Forn vörðubrot benda til mannaferða. Líklega fór Sámur á Leikskálum (Hrafnkelssaga) þessa leið.
