Hraunfossar eru líka nefndir Girðingar. Þeir eru meðal fegurstu náttúruperlna landsins, þar sem þeir spýtast undan jaðri Hallmundarhrauns út í Hvítá. Göngubrúin yfir Hvítá, sem var upprunalega byggð 1891 og endurnýjuð 1991, var notuð til að reka fé yfir ána en nú er öldin önnur og öllu fé er ekið á milli staða. Ofan brúarinnar er Barnafoss í Hvítá.
Barnafoss. Sagt er að eitt sinn hafi búið efnuð ekkja í Hraunsási, sem átti tvö börn. Hún fór eitt sinn með hjú sín til jólamessu að Gilsbakka og skildi börnin eftir heima. Börnin voru horfin, þegar fólkið kom til baka en spor þeirra fundust, þar sem þau lágu niður að steinboganum yfir ána. Augljóst þótti, að þau hefðu fallið í ána og drukknað. Móðirin lét þá brjóta bogann og gaf Reykholtskirkju Norðurreyki í minningu barnanna.
Heiðarvíga saga segir frá þessum steinboga: „Þá var brú á Bjarnafossi (Barnafossi) og lengi síðan“. Landnáma segir, að Hvítá hafi áður runnið um Melrakkadal (Skolladal) en Músa-Bölverkur í Hraunsási hafi veitt henni í gegnum ásinn í farveginn, sem hún rennur um nú.
