Íslenski ferðavefurinn

  • endursetja

Hellismannaleið

Landmannalaugar

Gönguleiðin Hellismannaleið

Gönguvegalengdin er samtals um 55 km. Hér er henni skipt í þrjá þægilega áfanga. Hún hefst í Landmannalaugum og endar á Rjúpnavöllum í Landsveit. Hún er öll stikuð og skálar eru í Landmannalaugum, Landmannahelli, Áfangagili og á Rjúpnavöllum. Dagleiðirnar eru svipaðar og á Laugaveginum.

Fyrsti áfanginn liggur frá Landmannalaugum í Landmannahelli, 16,5 km. Gengið er af stað í 590 metra hæð yfir sjó í Landmannalaugum yfir Laugahraun, líkt og við upphaf Laugavegargöngu. Við Brennisteinsöldu skiptast leiðir. Þar er farið til hægri út Vondugilsaura og upp Uppgönguhrygg. Þaðan út í Dómadal. Þar fyrir ofan er hæsti punktur leiðarinnar, 823 metrar. Við Dómadalsháls er farið fyrir Dómadalsleið og því er hægt að tvískipta leiðinni, eftir úthaldi og getu hvers og eins. Frá Dómdalshálsi er farið út með Lifrarfjallavatni að vestan og inn fyrir Löðmundarvatn, gengið meðfram Löðmundi og þaðan upp Hellisfjall og að skálum við Landmannahelli. Göngutíminn er 5-7 klst.

Annar áfangi er úr Landmannahelli, (590 m hæð) í Áfangagil og er um 17-18 km langur. Gengið er frá skálasvæðinu í Landmannahelli út undir Herbjarnarfell og þaðan í átt að Sauðleysum og út Lambaskarð. Þar er farið yfir Lambafitjahraun, sem rann 1913. Þar þarf að vaða yfir Helliskvíslina og er það eina áin á allri leiðinni, tiltölulega auðveld yfirferðar. Við Valagjá handan Helliskvíslar tekur við gamla Dyngjuleiðin og getur fólk því tvískipt leiðinni. Frá Valagjá er farið milli Valahnúka og Valafells, sem leið liggur í Áfangagil. Göngutími 5-7 klst.

Þriðji áfanginn er frá Áfangagili (um 260 m hæð) að Rjúpnavöllum (um 150 m hæð) og er um 21. km. Í Áfangagili eru nýjar réttir, þar sem árlega er réttað fé sem gengur á Landmannaafrétt. Gengið er út með öldunni fram að gömlum fjárbyrgjum í Sölvahrauni. Þaðan er gengið að hraunjaðri Skólkvíahraunsins frá 1970. Síðan liggur leið með Sauðfellsöldu að eystri upptökum Ytri-Rangár og meðfram ánni. Þar sjást Fossabrekkur við Rangá mjög vel. Þaðan er farið að kjafti Ófærugils, yfir brú og haldið svo áfram sem leið liggur að Rjúpnavöllum. Þar er nýtt skálasvæði í Landi Merkihvols, sem er efsta jörð í Landsveit. Göngutíminn er 5-7 klst.

Fært er öllum bílum að Rjúpnavöllum, sem eru rétt fyrir ofan Galtalækjarskóg. Hægt er að fara þangað daglega með rútu og einnig í Landmannahelli og Landmannalaugar með viðkomu á Leirubakka. Nauðsynlegt er að láta Kynnisferðir vita um farþega á þessum stöðum og í hvora áttina þeir ætla að fara.

SKÁLAR Á GÖNGULEIÐINNI LANDAMANNALAUGAR – RJÚPNAVELLIR:
Landmannalaugar. www.nat.is/fi_page_isl.htm gps hnit N 63 59 V 19 03
Landmannahellir: www.landmannahellir.htm gps hnit N 64 03 V 19 14
Áfangagil: Sjá Áfangagil gps hnit N 64 06 V 19 34
Rjúpnavellir: Rjúpnavellir gps hnit N 64 02 V 19 50

Myndasafn

Í grend

Landmannahellir
Landmannahellir er í móbergsfellinu Hellisfjalli sunnan Löðmunds og vestan Löðmundarvatns. Hann er 4 m hár, 8 m breiður og 14 m langur. Ferða ...
Landmannalaugar
Landmannalaugar eru í kvos á milli brattra fjalla við háa og dökka brún Laugahrauns. Undan hrauninu spretta margar heitar og kaldar lindir, sem ...
Leirubakki
Leirubakki á Landi er gömul jörð og höfuðból að fornu og nýju. Staðarins getur víða í fornum sögum, svo   sem Byskupasögum og Sturlun ...
Rjúpnavellir
Ferðaþjónustan á Rjúpnavöllum býður gestum sínum upp á rólegt og fallegt umhverfi þar sem Hekla gnæfir yfir og Ytri- Rangá rennur rétt ...

Allar ábendingar eru velkomnar. Reynum að hafa staðreyndir eins réttar og mögulegt er.

Veldu landshluta

nat.is er upplýsinga- og ferðavefur um Ísland sem var stofnaður 1998.  Íslenska útgáfan er is.nat.is.    ( nat@nat.is )