Furufjörður er stuttur og breiður fyrir opnu hafi á mörkum Stranda og Hornstranda. Vesturströnd hans 
er innan Hornstrandsfriðlands og fjallið Ernir gengur út ströndina að Drangsnesi. Þar innan við er Bolungarvíkurbjarg og klettastapi úr því, Bolungurvíkurófæra, gegnur út í sjó á flóði. Austan fjarðar er Furufjarðarnúpur og hinum megin er Þaralátursfjörður. Annar stapanna tveggja, sem standa framan við núpinn er kallaður Kanna vegna gatsins í gegnum hann. Hinn er Kerling, skessa, sem dagaði uppi með könnuna.m, Karlinn er Drangurinn í Drangsnesi og bátur hans sést í klettunum skammt undan. Um fjöru er fært fyrir núpinn. Saltvík er innar í firðinum og Saltvíkururð og Furufjarðarófæra eru milli hennar og núpsins. Þarna er aðeins fært í lygnu veðri á stórstraumsfjöru. Dagmálahorn er innst á austurströndinni.
Leiðin yfir Skorarheiði liggur upp úr Furufirði til Hrafnsfjarðar, eins Jökulfjarða. Leiðin var fjölfarin fyrrum og einnig yfir Svartaskarð í Þaralátursfjörð, Reykjafjörð og suður eftir Ströndum. Furufjarðará bugðast niður talsvert láglendi í fjarðarbotninum. Jörðin í Furufirði var meðal mest metnu jarða á Hornströndum og þar var þríbýlt, þegar byggðin fór í eyði í kringum 1950. Þarna eru nokkur hús, gamalt bænhús frá aldamótunum 1900 og skýli SVFÍ.
Árnabær var á sjávarbökkunum ófjarri bænhúsinu. Árni Jónsson og Elín Betanía Jónsdóttir, systir Hjálmars, sem síðastur bjó í Smiðjuvík. Salóme, dóttir Elínar, varð ráðskona hjá Árna eftir lát Elínar þar til hann flutti til Bolunarvíkur við Djúp. Salóme var dóttir fyrsta eiginmanns Elínar, Guðmundar Benediktssonar, bónda á Höfða í Leirufirði í Jökulfjörðum. Hann drukknaði 1901. Guðmundur Árnason og Sigríður Jakobsdóttir frá Reykjarfirði bjuggu síðust í Árnabæ á árunum 1946-50. Kristín Valgerður, dóttir Elínar og Árna, bjó með eiginmanni sínum, Benjamíni Eiríkssyni í skúr áföstum Árnabæ 1938-49. Fúnar leifar bátsins Hrings, sem Árni átti, liggja í Naustum niðri við sjó.
Vagnsbær var skammt frá Árnabæ. Þar bjó Vagn Guðmundsson, sonur Elínar, og kona hans Hjálmfríður Jónatansdóttir 1934-50. Þau fluttu til Hnífsdals og Furufjörður var kominn í eyði. Árnabær er í rústum en Vagnsbær var gerður upp sem sumarbústaður.
Bærinn á Bökkum var þriðja býlið í Furufirði. Ólafur Samúelsson og Guðmundína Einarsdóttir, kona hans, bjuggu þar með hjúum og börnum í 17 ár til 1944.
