Skeið á Suðurlandi
Svæðið milli Flóa og Stóru-Laxár og Þjórsár og Hvítár er kallað Skeið. Landslagið er flatt og mýrlent og undirstaðan er víðast hluti víðáttumikils hrauns, sem rann frá gígum á Heljargjársvæðinu vestan Vatnajökuls. Þetta hraun er talið 8000 ára, 800 km² og Hvítá og Þjórsá renna meðfram því til sjávar. Fjalllendi er aðeins að finna á ofanverðum Skeiðum, s.s. Vörðufell og hluta svokallaðra Hreppafjalla. Árið 1924 var Þjórsáráveitan grafin á Skeiðum. Þetta var dýrt verk en mjög gagnlegt. Ræktun er mikil á Skeiðum og allþéttbýlt.
Skeiðaréttir eru rétt sunnan Reykja. Þær eru frá 1881 en hafa verið endurbyggðar síðan, síðast vandlega á aldarafmælinu. Veggir réttanna eru u.þ.b. axlarháir og tyrfðir að ofan. Nátthólfið er stórt og mikið, hringlaga svæði. Þar draga Skeiða- og Flóamenn fé sitt sundur. Þegar fé var flest voru u.þ.b. 15 þúsundir fjár réttaðar þar.
Hvítá tekur stundum upp á því, að flæða yfir hluta Skeiðanna, þegar ís hrannast upp í hláku við Hestfjall. Hestfjall er í Grímsnesi, handan ár. Á Brautarholti er jarðhiti, sem er nýttur í góða sundlaug.
