Hnappavellir eru byggðarkjarni í Öræfum. Allt fram á 20. öld voru þar 5-7 býli. Hof er annar, stór byggðarkjarni í sveitinni. Líkt og annars staðar standa þar enn þá gömul torfhús, en þeim fer fækkandi. Hnappavellingar eiga stytzta leið til sjávar miðað við aðra bæi í Öræfum, aðeins 4 kílómetra. Í suðurbrún Öræfajökuls rísa tveir tindar, sem heita Hnappar (1758m og 1851m). Fjallið, sem við köllum Öræfajökul nú, var einnig kennt við þessa Hnappa.
