Viðfjörður er syðstur fjarða, sem ganga suður úr Norðfjarðarflóa. Þar er eyðibýli frá 1955 og vinsæll 
viðkomustaður ferðamanna, sem skjótast með bátum frá Neskaupsstað til að njóta dásamlegs umhverfis. Öldum saman var reimt á bænum í Viðfirði og upp úr sauð fyrir miðbik 20. aldar, þegar draugarnir gengu um ljósum logum og voru hættulegir fólki. Þeim var kennt um drukknun þriggja bræðra í róðri haustið 1936. Þórbergur Þórðarson fjallar um Viðfjarðarskottu, afturgengna stúlku af Viðfjarðarætt í verki sínu Viðfjarðarundrin 1943. Áður en bærinn fór í eyði hafði sama ættin búið á bænum síðan í kringum 1750.
Á Engihjalla eru sagðar dysjar þeirra, sem féllu í bardaga milli Viðfirðinga og Sandvíkurmanna, sem börðust vegna misklíðar um beitiland. Í fjallaskarðinu Dys milli Reyðarfjarðar og Viðfjarðar eru sagðar dysjar 17-18 Spánverja, sem Viðfirðingar drápu. Allir, sem fóru um skarðið áttu að kasta steinum í þær sér til ferðarheilla.
