Þessi vötn eru á austanverðri Melrakkasléttu, í Svalbarðshreppi. Þernuvatn er þeirra langstærst, 
1,6 km². Það er grunnt og í 122 m hæð yfir sjó. Allstór hólmi er í vatninu miðju. Til þess falla lækir í kring og úr því Þernulækur til Kollavíkurár.
Hvilftarvatn er lítið, 0,2 km², grunnt og í 120 m hæð yfir sjó. Aðrennsli er lítið og úr því fellur lækur til Deildarvatns, sem er 0,4 km² og grunnt. Þaðan rennur Deildará, sem síðar heitir Sveinungsvíkurá. Þjóðvegur 85 liggur milli vatnanna. Í þessum vötnum er bæði bleikja og urriði og Hvilftarvatn er talið best til veiða.
