Íslenski ferðavefurinn

  • endursetja

Húsavík Loðmundarfjörður

Húsavík er lítil vík norðan Loðmundarfjarðar með Kolbeinsnes að norðan og Hafnarnes að sunnan. Í  miðri víkinni er Húsavíkurkambur, sem skiptir víkurbotninum í tvo sveigmyndaða reiti. Víkurá rennur um u.þ.b. 6 km langan dal og víða í fjöllunum er ríólít. Mikið er af fallega sorfnum steinum í fjörunni.

Allt fram á miðja 20. öld voru fjögur býli í byggð í dalnum. Þeirra stærst var kirkjustaðurinn Húsavík, sem var metin dýrasta jörð á Íslandi á öldum áður. Hún fór síðust í eyði árið 1973. Hinn 5. marz 1938 fuku öll bæjarhúsin með fólki og fénaði niður fyrir sjávarbakkann í foráttuveðri. Allir komust af lítt meiddir, sem þykir ganga kraftaverki næst.

Katólsku kirkjurnar í Húsavík voru helgaðar Maríu guðsmóður og kirkjan, sem stendur þar nú, var byggð 1937-1939. Þetta er lítið trékirkja með sætum fyrir 25-20 manns og litlu klukknaporti. Hún skemmdist í veðurhamnum 1938 en stóð þó á grunninum. Í henni er skírnarskál úr tini og ártalinu 1685 og tveir koparstjakar frá svipuðum tíma. Tvenn gömul altarisklæði, gamall hökull og rykkilín úr kirkjunni eru í Þjóðminjasafni.

Veðrun og landbrot hafa brotið niður hluta af gamla kirkjugarðinum sem stendur á sjávarbakkanum, skammt frá kirkjunni, þannig að kistubrot og bein hafa verið að koma í ljós. Húsavík var allstór verstöð forðum og allt til 1930. Þar höfðu Færeyingar bækistöð á sumrin. Ágætur jeppavegur liggur frá Borgarfirði eystri um Húsavíkurheiði til Húsavíkur og áfram um Nesháls til Loðmundarfjarðar.

 

Myndasafn

Í grend

Borgarfjörður eystra
Borgarfjörður eystra er nyrstur fjarða, sem ganga inn í Austfjarðahálendið. Borgarfjörður liggur á mótum blágrýtissvæðis og líparítsv ...
Sögustaðir Austurlandi
Ýmsir staðir tengdir sögu landsins Aðalból ...

Allar ábendingar eru velkomnar. Reynum að hafa staðreyndir eins réttar og mögulegt er.

Veldu landshluta

nat.is er upplýsinga- og ferðavefur um Ísland sem var stofnaður 1998.  Íslenska útgáfan er is.nat.is.    ( nat@nat.is )