Gullborgarhraun í Hnappadal rann frá Gullborg. Þar fundust fagrir dropasteinshellar árið 1957. Þeir eru á náttúruminjaskrá og óheimilt er að skoða þá nema með fylgd frá Heggstöðum. Minjar um mannaferðir fundust í hellunum en óvíst er, hverjir voru þar á ferðinni.
Kenningar eru uppi um veru útilegumanna eða dvöl Arons Hjörleifssonar í þeim samkvæmt Sturlungu. Hann var í slagtogi með Guðmundi Arasyni, biskupi, í Grímsey, barðist þar hraustlega fyrir hann og komst naumlega undan. Sturlungar voru á höttunum eftir honum til að drepa hann. Hann fór huldu höfði um allt land og faldi sig um tíma í Gullborgarhrauni. Aronshellir var þekktur en týndist.
