Arnarnes gengur fram milli Skutulsfjarðar og Álftafjarðar, suður úr Ísafjarðardjúpi. Upp frá því er mynni Arnardals. Fjallið Ernir er yzti hluti Kirkjubólsfjalls vestan hans en Hömlur að austanverðu.
Bæjarþyrpingin í mynni Arnardals heitir Neðri-Arnardalur. Eyðibýlið Fremri-Arnardalur er innar í dalnum. Þar fæddist og ólst upp Hannibal Valdimarsson (13/1 1903-1/9 1991). Hann var m.a. forseti ASÍ og ráðherra.
Fóstbræðrasaga segir frá heimsókn Þormóðs Bersasonar á bænum Neðri-Arnardal, þar sem Kolbrún var heimasæta. Hún varð nafngjafi hans: „Kolbrúnarskáld”.
Fyrstu veggöng, 30 m löng, voru gerð í gegnum Arnardalshamar 1948.
Hin geysifjölmenna Arnardalsætt er kennd við þennan dal. Ari Gíslason og Valdimar Björn Valdimarsson gerðu henni ítarleg skil í stóru verki 1959-1968.
