Vestasta áin í Þistilfirði. Þetta er meðalstór bergvatnsá, sem veidd er með 2-3 stöngum. Laxgengt er eina 
15 kílómetra fram að Stórafossi og þangað brunar oft fyrsti vorlaxinn. Gott hús er við ána og þar hugsa menn um sig sjálfir. Veiði í öllum Þistilfjarðaránum hefur verið á niðurleið síðustu sumur, en teikn eru á lofti um að ástandið geti farið batnandi. Yfirleitt er sumaraflinn á bilinu 150 til 250 laxar, en í góðu sumri getur hann farið í um 400 laxa. Áin er og þekkt fyrir stórlaxa rétt eins og aðrar ár á þessu svæði.
