Háifoss í Fossá í Þjórsárdal er 122 m hár og líklega þriðji hæsti foss landsins. Allt fram undir aldamótin 1900 var fossinn nafnlaus, en þá tók Dr. Helgi Pétursson sig til og nefndi hann. Rétt austan Háafoss er annar litlu lægri, Granni. Léttasta leiðin að fossinum er frá línuveginum milli Tungufells og Sandafells. Þaðan þarf aðeins að ganga stuttan spöl niður í mót, en fara verður gætilega á brúnum gilsins.
Einnig liggja jeppaleiðir frá Rauðuskriðum og Stöng í Þjórsárdal langleiðina inn að fossunum neðan frá. Á endastöð þar verður að ganga nokkurn spöl upp í mót til að komast í návígi við fossana.
