Íslenski ferðavefurinn

  • endursetja

NANCÚN

cancun

NANCÚN

Cancún liggur fyrir norðurströnd Yukatanskagans. Flatarmál er 10 km² og íbúafjöldi í kringum 60.000.

Skemmtiferðaskip eru tíðir gestir. Flest þeirra koma frá Miami eða San Juan (Puerto Rico).

Flugsamgöngur byggjast mest á leiguflugi, sem tengir eyjuna beint við Frankfurt am Main, München, Düsseldorf og Zurich eða Mexíkóborg, Mérida, Monterrey og ýmsa bandaríska flugvelli.

Eyjan opnaðist ferðamönnum í kringum 1970 og síðan þá hefur hún verið tengd landi með brúargerð og uppfyllingum á eiðinu milli lands og eyjar.

Upprunalega bjuggu mayar á eyjunni, sem Stephens og Catherwood nefndu fyrst Can-cune (mayamál = kerið við enda regnbogans) árið 1843. Árið 1970 var farið að vinna að uppbyggingu eyjunnar en þar bjuggu varla fleiri en 100 manns af mayaættum og lifðu af fiskfangi og Chiclesöfnun (Chicle er hvítur gúmmívökvi úr sapodillaplöntunni (Achras sapola), sem einkum er notaður í tyggigúmmí).

Mexíkóska ríkisstjórnin og mörg einkafyrirtæki kusu eyjuna sem hentugan áfangastað ferðamanna. Þegar árið 1986 var hún orðin mikilvægasti ferðamannastaður Mexíkó með 8000 gistirýmum. Árið 1988 kom bakslag í seglin, þegar fellibylurinn Gilbert skildi eftir sig slóð eyðileggingar á Cancún og Yukatan-skaganum. Ímynd draumaparadísar ferðamanna hefur líka raskast svolítið vegna plöntusjúkdóms, sem hefur lagzt á pálmatrén á eyjunni undanfarin ár.

Fellibylurinn Vilma lék Cancún og Conzumel grátt 22. október 2005

Cancúnborg er á meginlandinu. Hún er tilraunabær með opinberri þjónustu, verzlunum, hótelum, veitingastöðum o.fl. og hefur ekki upp á margt annað að bjóða. Baðstrendur og önnur aðstaða fyrir ferðamenn eru aðallega á eyjunni sjálfri. Þar eru raðir íbúðahótela, orlofshúsa og stórra hótela auk stórrar ráðstefnumiðstöðvar fyrir allt að 2500 þátttakendur. Eiðið milli Cancúnhöfða og Nizuc-höfða skilur á milli Karíbahafs og Nichuptelónsins. Norðan þess er meginlandsbrúin, sem liggur meðfram Mujeresflóa.

Mannfræðisafnið er í ráðstefnumiðstöðinni. Þar er hægt að kynnast menningu maya.

CEDAM-safnið er í grennd við Bahía-stórhýsið á Paseo Kukulkán. Þar er að finna minjar, sem mexíkóskir kafarar hafa fundið á sjávarbotni.

Baðstrendur. Allt frá borgarmörkunum, meðfram Cancún-breiðgötu og Paseo Kukulkán, teygjast eftirtaldar strendur: Perlas, Juventud, Linda, Langosta, Tortugas, Caracol og Chac-mool en hinar þrjár síðastnefndu eru vinsælastar. Pok-ta-Pok golfvöllurinn er við Paseo Kukulkán.

Maya-rústir er víða að finna á milli Cancún- og Nizuchöfða. Þær eru að mestu í svokölluðum Puucbyggingarstíl. Búið er að uppgötva pýramída með hofum og yfir 50 grafir.

Ferð til Playa del Carmen
Strandvegurinn, MEX 307, liggur meðfram flugvellinum í Cancún til Puerto Morelos eftir 37 km akstur. Frá þessum hafnarbæ sigla ferjur til Cozumel. Eftir 25 km til viðbótar er komið til Beté-höfða, þar sem tveir samsíða vegir um akurlendi liggja niður á fallegar baðstrendur. Fyrir ströndinni eru ákjósanlegir köfunarstaðir. Enn þarf að aka 10 km til að komast til litla hafnar-bæjarins Playa del Carmen. Þaðan sigla líka ferjur til Cozumel og þar er falleg strönd, sem hefur liðið fyrir þenslu síðustu ára. Boðið er upp á köfunarferðir og sjóstangaveiði.

Myndasafn

Í grend

Allar ábendingar eru velkomnar. Reynum að hafa staðreyndir eins réttar og mögulegt er.

Veldu landshluta

nat.is er upplýsinga- og ferðavefur um Ísland sem var stofnaður 1998.  Íslenska útgáfan er is.nat.is.    ( nat@nat.is )